Поранешниот судија Панчевски се пријави на јавниот оглас за државен јавен обвинител
Процесот за избор на нов државен јавен обвинител влезе во поактивна фаза, откако уште еден кандидат официјално се пријави на јавниот оглас што го распиша Собранието. На огласот се пријави поранешниот претседател на Основниот суд Скопје, Владимир Панчевски.
Во пријавата поднесена денеска до Собранието, Панчевски наведува дека ги исполнува сите законски критериуми за функцијата државен јавен обвинител. Тој до надлежните органи доставил целосна документација и докази за исполнување на условите пропишани во член 61 од Законот за Јавното обвинителство, како и посебните услови од член 62 став 1 алинеја 1 од истиот закон.
Постапката за избор се отвори по оставката на Љупчо Коцевски, кој во декември минатата година поднесе неотповиклива оставка од функцијата државен јавен обвинител. До изборот на нов носител на функцијата, вршител на должност е Анита Тополова-Исајловска, дотогашен заменик-републички јавен обвинител.
Претходно, интерес за пријавување најави и поранешниот виш јавен обвинител на скопското Вишо јавно обвинителство, Мустафа Хајрулахи.
Огласот за избор на нов државен јавен обвинител беше објавен на 12 јануари годинава, со рок за пријавување од 15 дена од денот на објавувањето во „Службен весник“. Кандидатите треба да имаат најмалку 10 години непрекинат работен стаж како јавни обвинители или судии во областа на кривичното право.
