Поранешната директорка на Националната агенција за европски програми осудена на две години затвор
Основниот кривичен суд Скопје ја прогласи поранешната директорка на Националната агенција за европски образовни програми и мобилност, Лидија Димова, за виновна за злоупотреба на службена положба и овластување, и ја осуди на казна затвор од две години.
Димова исто така е должна да плати судски паушал од 10.000 денари, да ги покрие судските трошоци и во рок од шест месеци да ја надомести штетата од 22,7 милиони денари што ја претрпела Националната агенција.
Судијката Фанка Јанчулева Михаиловска ја ослободи Димова од делото измама, како и третообвинетата Ана Павлиду за „несовесно работење во службата“.
Според судот, Димова со нестручно и несовесно постапување овозможила противправна имотна корист на трети лица, при што била предизвикана штета од 2,818 милиони денари на европските фондови.
„Во делот на измама на штета на европски фондови, не е опишан начинот на кој е извршено делото и не е наведено како биле искористени лажните податоци. Без вакви елементи, недостига основ за делото измама и судот беше спречен објективно да оцени дали обвинетата пропуштила и дала невистинити податоци и со тоа предизвикала штета на фондови на ЕУ. Поради тоа, судот донесе ослободителна пресуда за овој дел“, изјави судијката.
Обвинението против Димова беше поднесено во јуни 2022 година. Според Обвинителството, во периодот од 2018 до 2020 година, како директор на Националната агенција, Димова ја злоупотребила својата службена положба со цел да прибави значителна имотна корист за други лица. Таа постапила спротивно на Законот за јавни набавки и Законот за основање на Националната агенција за европски образовни програми и мобилност, непочитувајќи ги начелата на законитост, еднаквост и јавност.
Со тоа што не објавила јавен конкурс и не постапила совесно, стручно и непристрасно, Димова ги дискриминирала потенцијалните кандидати и овозможила повластување на надворешни лица кои биле ангажирани како соработници, експерти и обучувачи.
Застапник на обвинението беше обвинителката Сузана Мирческа Кузмановска.
