Поплавени земјоделски земјишта, дворови, куќи, помошни објекти и магацини за складирање на јаболка во Ресен

Обилните врнежи од дожд и снег во изминатите денови предизвикаа проблеми на повеќе локации во земјата. Според вонредната информација на Центарот за управување со кризи (ЦУК), до 09:00 часот најмногу последици се регистрирани во источниот и југозападниот дел од државата, како и во делови од Пелагонија и Полошкиот регион.

Во Кочани и Штип, кај Оризарска река во селото Грдовци е забележано излевање. Водостопанство „Брегалница“ интервенира со багер гасеничар, а механизацијата останува на терен. Од понеделник ќе започне чистење на речното корито од Грдовци кон Оризари за да се спречат идни несакани последици. Сообраќајот на патниот правец Кочани – Грдовци е нормализиран, а одрони се појавуваат на повеќе локални патишта во источниот дел, каде „Македонијапат“ интервенира во расчистувањето.

Во Битола, во населбата Стрчин, КЈП „Нискоградба“ расчистува нанос од чакал и земја. Во селото Кравари има заезерени земјоделски површини, но без опасност по објекти. Поплавени земјоделски површини се пријавени и во селата Жабени и Породин, а „Водостопанство“ интервенира на Жабјанска река. Се бележи излевање и на Елешка река со поплавени површини, но нивото на водата во поголемиот дел од реките е во опаѓање.

Во Ресен се поплавени земјоделски површини, дворови, куќи, помошни објекти и магацини за складирање јаболка. Нивото на Голема река е намалено од 2,20 на 1,40 метри. Екипи од локалната самоуправа, „Македонијапат“ и ЈКП „Пролетер“ вршат увид на терен, а состојбата е нормализирана.

Во Крушево, поради поројните врнежи водата за пиење е заматена и се препорачува превривање најмалку 10 минути. Нивото на Црна река кај Бучин е покачено, но водата која се излеала се повлекла. Надлежните екипи работат на зајакнување на насипите кај критичните точки.

Во Демир Хисар е затворен локалниот пат кон селото Мренога поради оштетување на мост на Боишка река. Локацијата е обезбедена од надлежните служби.

Од Прилеп се пријавени поплавени дворови и приземни простории во селото Лажани, каде е регистрирана и штета на тутун. Поплавувања има и во селото Пешталево поради неисчистени канали. За расчистување интервенирала градежна механизација.

Во Тетово, патот кон Бање е исчистен, но СВР Тетово го забрани сообраќајот од безбедносни причини. Патиштата кон селата Жерма и Бродец се проодни, а состојбата во селото Стримница (Општина Желино) се следи континуирано од надлежните служби.