ПОЛСКИОТ ПРЕТСЕДАТЕЛ: Украина не е примена во НАТО, членките не сакаат да испраќаат свои војници таму, не би сакал да ја донесам таа одлука
УКРАИНА не е примена во НАТО, бидејќи земјите од Алијансата не сакаат да испраќаат свои војници таму, изјави за новинарите полскиот претседател Анджеј Дуда по самитот на НАТО во Вилнус.
– Ве молиме разберете дека денес нема да биде можно да се прифати Украина во НАТО. И ова ви го кажувам со целосна одговорност, како претседател на Република Полска, рече Дуда.
Тој објасни дека, кога Украина ќе добие членство во НАТО, веднаш ќе побара да испрати војници од земјите на Алијансата.
-Доколку Украина денеска добие полноправно членство во НАТО, тогаш мора да се претпостави дека истиот или следниот ден би побарала примена на петтиот член, односно колективна одбрана. Ако Алијансата постапи како што треба во таква ситуација, тогаш ќе моравме да ги испратиме нашите војници на фронтот, како и сите други земји од блокот. Полските војници ќе мора да одат на фронтот, објасни Дуда.
– Како претседател не би сакал да донесам таква одлука, заклучи тој.
Во исто време, полскиот лидер рече дека и раководството на Украина ја разбира нереалноста за итен влез во НАТО, „со оглед на актуелната војна“.
Меѓутоа, Дуда сака да ја види Украина во НАТО во иднина.
– Ова е важно за нашата безбедност, за источното крило на НАТО. Тоа ја поместува границата на исток, ја зајакнува безбедноста на Полска во географската димензија. Тоа е земја која е двојно поголема од Полска – 600 илјади километри, рече тој.
Лидерите на НАТО одобрија повеќегодишен пакет за поддршка на Украина, кој се состои од три елементи. Генералниот секретар на НАТО Јенс Столтенберг изјави дека пакетот вклучува повеќегодишен план за поддршка за постигнување интероперабилност со НАТО, создавање на Совет НАТО-Украина и укинување на условите за исполнување на акциониот план за членство, со што ќе се намали процесот на пристапување од две фази до една. Според генералниот секретар, лидерите на земјите од алијансата потврдиле дека Украина ќе стане членка на НАТО кога сојузниците ќе одлучат дека се исполнети условите.
