Половина од младите до 18 години во Македонија се пушачи – започнуваат уште од 13-годишна возраст!
Половина од младите до 18 години во Македонија се пушачи, алармира најновото истражување. Истото покажува дека најголем дел од нив започнуваат со пушење уште на 13-годишна возраст. Организацијата бара итна реакција од институциите, вклучувајќи построга контрола и зголемување на даноците за новите тутунски производи.
Новото истражување на „Аналитика“ открива загрижувачка слика: 40% од младите до 18 години се активни пушачи. Овој висок процент го потврдува статусот на Македонија како земја со една од највисоките стапки на пушачи во светот, каде според Институтот за јавно здравје, 45,4% од целокупното население пуши.
Тамара Миовиќ-Спасова од „Think Tank Аналитика“ повикува на итно преиспитување на законските мерки. Според неа, неопходно е поголемо почитување на законската регулатива што ја забранува продажбата на тутунски производи на малолетници.
„Нашите анализи покажуваат дека кај младите до 18 години, купувањето не им се забранува. Потребно е поголемо почитување на законот“, нагласи Миовиќ-Спасова.
Дополнително, „Аналитика“ сугерира и фискални мерки, особено за новите производи кои стануваат сѐ попопуларни кај младите, како што се електронските цигари.
„Овие производи сѐ уште имаат ниски цени, па затоа има простор за зголемување на акцизата. Со тоа би станале помалку достапни за младите“, објасни таа.
Од „Аналитика“ нагласуваат дека новите методи на пушење се штетни и мора да бидат опфатени со Законот за заштита од пушење исто како и класичниот тутун.
Одржаната работилница, на која беа презентирани податоците, испрати апел до целото општество. Со оглед на тоа што само 5% од граѓаните успешно се откажале од пушењето во последните години, експертите сметаат дека е клучно да се даваат позитивни примери за да можат младите да разберат колку е штетна оваа навика и воопшто да не започнат со неа.
