Полицијата во Есен бара сведоци за да го расчисти убиството на македонскиот државјанин

МНР преку конзуларното одделение во Бон добило информации од надлежните германски институции дека во утринските часови во саботата во есен починал 32-годишниот македонски државјанин Е.И.

Мажот бил претепан до смрт со тап предмет по расправија со двајца Еритрејци во саботата околу два часот. Според полицијата во есен, случаен минувач се обидел да му пружи прва помош на македонскиот државјанин, којшто бил во несвест. Тој бил пренесен во болница, каде што за кратко починал од сериозните повреди. Напаѓачите, на 25 и 29-годишна возраст, побегнале од местото на убиството, а подоцна биле уапсени на железничка станица во Есен и во Милхајм. Полицијата од Есен на својата интернет-страница објави повик да се пријават сведоците на убиството на 32-годишниот македонски државјанин викендов.

„За да се расчистат прецизните факти за случајот, шефот на одделот за убиства ургентно бара повеќе сведоци на кривичното дело. Поточно, бараме од минувачите кои биле на улицата Кетвигер во областа Бургплац, до плоштадот Вили Брант, помеѓу 1 и 2.15 часот и забележале луѓе како се расправаат, да нè контактираат“, стои во објавата на полицијата во Есен.

Конзуларното одделение во Бон останува во тесна комуникација со надлежните органи на Германија до целосно расветлување на случајот.