Почна увозот на работници – во земјава работат стотина Индијци

Според податоците на Агенцијата за вработување, заклучно со крајот на октомври во земјава им се издадени дозволи за вработување на 4.525 странци. Најголем дел од нив е од Турција. Во Македонија работат над 2.000 лица од таа земја. Следуваат Косово и Србија со над 300 работници, па Албанија и Индија, пишува Блумберг Адриа.

Во земјава странските работници, во согласност со евиденцијата на Агенцијата, најчесто работат како градежни работници, столари, електричари, армирачи, но има и менаџери. Работодавците велат дека ангажирањето работна сила од далечните азиски земји е прашање за преживување. Нема иднина за компаниите ако нема работници, а тука не можат да ги најдат.

Непалци, Индијци, Филипинци, лица од Бангладеш, Шри Ланка… работниците мигранти од Азија ги спасуваат земјите од регионот од хроничен недостиг од работна сила. Во желбата за подобар живот многумина се соочуваат со голем број проблеми. Има и многу лажни огласи и ветувања. Колку плаќаат додека да дојдат на работа во нашиот регион? Износите почнуваат од илјадници евра. Што се случува на пазарот на странски работници?

Дваесет и едногодишната Непалка Аниша живее во Панчево, гратче во Војводина во близината на Белград, и лежерно разговараме со неа во градината на ресторанот во кој работи. „Сакав да заминам од Непал поради пари. Така му објаснив на моето семејство, кое ме разбра“, вели таа.

Заклучно со септември, во Македонија имало 105.357 невработени што активно бараат работа. Тоа е последен податок од Агенцијата за вработување. Во согласност со последните податоци на Државниот завод за статистика што се однесуваат на првата половина од годината пак, 689.714 лица во земјава се вработени. Стапката на невработеноста е историски најниска од независноста и изнесува 13,1 отсто заклучно со вториот квартал од годинава.