Почина момчето кое во 2018 година беше спасено од тајландската пештера
Дуанглеч Промтеп, едно од 12-те момчиња спасени од тајландска пештера во 2018 година, што со денови се следеше во медиумите, почина во Обединетото Кралство, јавува Би-би-си.
17-годишникот во неделата бил пронајден во несвест во студентски дом во Лестершир и бил пренесен во болница, каде што починал во вторникот. Посетуваше фудбалска академија во Британија. Не е познато што ја предизвикало неговата смрт, но полицијата не ја смета неговата смрт за сомнителна.
Тајландските медиуми јавуваат дека тој се здобил со повреда на главата.
По фудбалскиот тренинг на 23.06.2018 година, фудбалскиот тим Диви свињи со велосипед отиде во пештерата Там Луанг. Но поради ненадејно невреме пештерата била поплавена, а заедно со тренерот останале заробени повеќе од две недели.
Девет дена поминале во темнина и без храна. Во нивното спасување учествуваа 10.000 луѓе. Ги пронашле нуркачи кои им испраќале храна и писма од нивните семејства додека планирале како да ги извлечат. На крајот беа спасени.
Промтеп наполни 13 години во пештерата. Останатите момчиња тогаш биле на возраст од 11 до 16 години, а тренерот Екафон Кантавонг имал 25 години.
