Почина Драган Б. Костиќ, легендарен македонски музички новинар и радиоводител
Драган Б. Костиќ, еден од најпрепознатливите гласови во историјата на Македонското радио, почина на 75-годишна возраст. Погребот ќе се одржи утре во капелата на гробиштата Бутел, информираше неговиот син Бане Костиќ преку социјалните мрежи.
„Со длабока тага ги известуваме роднините, пријателите и познаниците дека утринава почина Драган Костиќ – сопруг, татко и дедо. Поменот ќе се одржи утре, недела, 21 декември, од 12:30 до 13:30 часот. Семејството изразува искрена благодарност до целиот тим и раководството на Државната неврохируршка клиника во Скопје, особено до д-р Благоја Шунтов, за грижата и посветеноста. Нека му е вечна слава и спомен. Патувај мирно, Диско селекторе“, напиша Бане.
Драган Костиќ е роден на 10 јуни 1950 година во Скопје. Својата кариера ја започнал во Македонското радио, каде остави неизбришлива трага, особено како автор и водител на култните емисии „Диско селектор“ и „Заборави ако можеш“. „Диско селектор“ започна со емитување на 29 јуни 1974 година и со текот на децениите стана музички белег за повеќе генерации, додека „Заборави ако можеш“ го достигна своето 4.500-то издание до 31 октомври 2013 година.
По повод 30 години од „Диско селектор“, Костиќ организираше голема музичка забава на лизгалиштето во Скопје, со околу 6.500 продадени влезници, настан што се памети како еден од најмасовните музички собири во земјава.
Покрај овие емисии, тој беше автор на други радиоформати, меѓу кои „Радиоурнебес“, „Пријатели, добар ден“ и квизот „Јас ли сум на ред“. Костиќ беше познат и како посветен колекционер на музика, со над еден милион аудио записи, што ја прави неговата колекција една од најголемите во регионот.
Во 2018 година започна телевизиска емисија „Б со точка“ на Телевизија 24, која се емитуваше во две сезони до 2019 година. Драган Костиќ ќе остане запаметен како еден од најзначајните музички новинари и радиоводители во Македонија.
