Почина американскиот атлетичар Џим Хајнс

Американецот Џим Хајнс, првиот атлетичар кој официјално истрча 100 метри под десет секунди, почина на 77-годишна возраст, соопшти денеска Светската атлетика.

„Покрај тоа што беше олимписки шампион на 100 метри во 1968 година, Хајнс е познат и по тоа што беше првиот човек што официјално истрча под прагот од десет секунди “, се вели во соопштението на Светската атлетика.

Хајнс го заврши финалето на 100 метри на Олимписките игри во Мексико во 1968 година за 9,95 секунди, победувајќи ги Ленокс Милер од Јамајка и сонародникот Чарлс Грин.
На Олимпискиот стадион најпрвин беше прикажано време од 9,9 секунди, потоа беше сменето на 9,89, пред конечно да биде забележано 9,95 секунди како официјално време.

„ Тие го поправаа времето бидејќи никој не можеше да верува дека човек може да трча толку брзо “, рече Хајнс во интервју за францускиот тим во 2016 година.

Тоа време стоеше како светски рекорд во следните 15 години, додека Калвин Смит не го собори во 1983 година во Колорадо Спрингс трчајќи ги 100 метри за 9,93 секунди.

Актуелниот светски рекорд на 100 метри од 9,58 секунди го постави легендарниот Јусеин Болт на Светското првенство во Берлин во 2009 година.

Џим Хајнс го освои златото и во Мексико со американската штафета 4х100 метри, а тоа му беа единствените два олимписки медали, бидејќи набргу потоа, на 22 години, стави крај на атлетиката и започна кариера во американскиот фудбал.