Бабовски од АХВ: Нема тешки метали во овошјето и зеленчукот, некој помешал микро и милиграм
„Ширење на лажна паника е кривично дело, сите овие резултати кои се однесуваа на присуство на тешки метали во овошјето и зеленчукот, се негативни“, откри директорот на Агенцијата за храна и ветеринарство, Николче Бабовски.
– Не знам која беше целта да се шират лажни вести со негативни резултати, некој помешал микро и милиграм. Сите се во рамките на дозволените количини – додаде тој.
Бабовски истакна дека ширење лажна паника и тревога е кривично дело, а дали АХВ за тоа ќе поднесе пријава, ќе се знае, потенцира, наредните денови.
-Негативни се сите резултати за наводни резидуми од метали или присуство на тешки метали во овошјето и зеленчукот. Не знам која беше целта да се шири паника меѓу граѓаните. Изгледа некој некого излажал или некој помешал микро и милиграми, рече Бабовски, одговорајќи на новинарски прашања во врска со обвинувањата на опозицијата.
Пред два дена Цветан Трипуновски од ВМРО-ДПМНЕ на својот фејсбук профил сподели информација според која олово, кадмиум и арсен се пронајдени во домат и краставица. Тоа, како што наведе Трипуновски, го покажуваат најновите извештаи за анализи направени од Државната фитосанитарна лабораторија.
