Победа вредна плејоф: МЗТ со тројки го торпедира домаќинот на турнирот во Нови Сад (ФОТО)
Тоа беше возбудлив и до крај неизвесен дуел, во кој аеродромци имаа фантастично прво полувреме во кое во првиот период со серија 16-2 дојдоа до огромни плус 14 (24-10), додека до пред заминување на одмор во три наврати имаа предност и од 15 поени. Тоа беше канонада на тројки на сино-белите, со оглед што во првите 20 минути постигнаа 11 тројки со само шест промашувања. Второто полувреме, сепак, не беше така добро во делот на шутот, со оглед што избраниците на тренерот Васко Атанаасов ги промашија првите 11 удари за три поени, поради што Војводина направи резултатски пресврт и поведе со 73-72. Тоа како да ги разбуди шутерите во таборот на македонскиот шампион, кои потоа врзаа три тројки во низа за ново резултатско одлепување.
Крајот исто така беше возбудлив, а клучни беа трите поени на Седрик Расел на самиот истек на нападот во последната минута за 86-82, откако претходно Марко Баковиќ ја заби топката по офанзивен скок за пресврт по негативата 81-82. Хрватскиот кошаркар беше реализатор и на побендичкиот кош на 13 секунди до крајот, а својот одличен настап го потврди и со двете прецизно изведени слободни фрлања пред самиот крај на пресметката. Баковиќ беше херојот во таборот на скопјани со оглед што средбата ја заврши со 17 поени со 4/4 за тројка и само едно промашување од поле, додека Ејасу Ворку и Војдан Стојановски дополнија со 13 поени.
МЗТ зад себе има перфектен турнир со три победи во низа за скор 7-3 и делба на третата позиција на табелата заедно со Војводина и Широки, додека пред нив се Златибор и Спартак Суботица со по една победа повеќе. Последните три меча од регуларниот дел од сезоната ќе се одиграат кон средината на следниот месец и тоа во босанскиот град Широки.
