По случајот со врсничкото насилство во Ѓорче Петров, во училиштата ќе има дежурни наставници за време на одморите!
По случајот со врсничко насилство во основно училиште во скопската општина Ѓорче Петров, Министерството за образование и наука најави засилени мерки за подобрување на безбедноста во училиштата и поголем надзор за време на одморите.
Министерката за образование и наука Весна Јаневска изјави дека Министерството постапува согласно законските надлежности, а случајот веќе е пријавен во Државниот просветен инспекторат.
Таа информираше дека МОН дополнително испратило допис до градоначалниците и до училиштата, со кој се бара повторно воведување на пракса што постоела во минатото – за време на големите и малите одмори да има дежурни наставници, наместо дежурни ученици.
Според Јаневска, наставниците треба активно да водат сметка за случувањата во училиштните ходници, дворовите и другите простори, со цел навремено да се спречат инциденти и несоодветно однесување.
„Тоа што се случило надвор од училиштето не е оправдување. Тоа се ученици на одредено училиште и наставниците мора да имаат увид во тоа како се однесуваат нивните ученици, затоа што тоа е воспитно-образовен процес“, изјави министерката.
Таа додаде дека со дописот дежурните наставници се задолжени да бидат на видно место, за нивното присуство да може да биде констатирано и при евентуални контроли од Државниот просветен инспекторат.
Јаневска изрази надеж дека мерката ќе даде позитивни резултати и ќе придонесе за намалување на врсничкото насилство.
Воедно потсети дека училиштата имаат обврска да постапуваат и согласно прирачникот за справување со врсничко насилство, како и согласно законските прописи.
„Градоначалникот, директорот и наставниците треба да си ги спроведат своите обврски така како што е пропишано. МОН го прави тоа што треба да го направи“, рече Јаневска.
Министерката ова го изјави одговарајќи на новинарско прашање по доделувањето на државната награда „Гоце Делчев“ за остварувања во науката.
