По осум месеци битка, почина и бебето чија мајка умре при породување во кумановската болница

На клиниката за детски болести во Скопје, по осум месеци интензивна медицинска нега, почина бебето чие раѓање беше проследено со смртта на неговата мајка при породување во општата болница во Куманово, пишува СДК.МК

Трагедијата започна на 27 септември минатата година, кога триесет и едногодишна жена во деветти месец од уредна бременост беше примена во болницата со прснат воденик и отпочнато породување. По повеќе од 30 часа без значителен напредок и со влошување на состојбата, таа ненадејно почина. Веднаш бил извршен итен царски рез, при што бебето било извлечено живо и транспортирано во Скопје.

Иако новороденчето веднаш било ставено на респиратор и подложено на интензивна терапија, неговата состојба останала критична. На 23 мај, семејството било информирано дека бебето починало.

„И бебето ја изгуби битката. Ова е дополнителен шок за семејството, кое се соочува со огромна загуба. Убедени сме дека имало лекарска грешка и ќе ја бараме правдата до крај“, изјави адвокатот на семејството, Христијан Георгиевски. Тој најави дека ќе достават нова медицинска документација до обвинителството, со цел продолжување на истрагата.

Иако комисијата на министерството за здравство и обдукцискиот наод не утврдија пропусти во постапката, семејството тврди дека има нови докази кои укажуваат на доцна реакција и пропусти во лекувањето, што, според нив, довело до фатални последици и за мајката и за детето.