Пиши бриши: Додека Арсовска во живо на ФБ обвинуваше, општина Чаир го поништил решението!
Општина Чаир го повлече решението за легализација на стан во зграда за која скопската градоначалничка Данела Арсовска тврди дека е дивоградба изградена минатата година. Оваа одлука доаѓа само час по нејзиното јавно обвинување дека е извршен фалсификат во процесот на легализација, што предизвика силни политички тензии и меѓусебни обвинувања меѓу општината и градот.
Арсовска во живо на социјалните мрежи директно го посочи градоначалникот на Чаир, Висар Ганиу, како одговорен за легализацијата, нарекувајќи ја криминална и поддржана со фалсификувани документи. Таа објави документ од катастарот, обезбеден истиот ден, во кој стои дека решението за легализација е поништено поради „грешка во утврдување на фактичката состојба“ во геодетскиот елаборат.
Иако решението е датирано на 2 мај, истото било поднесено во катастарот дури на 27 мај, неколку часа по јавните обвинувања на Арсовска, што според неа претставува обид за прикривање на веќе извршен криминал. Таа обвинува дека институциите, наместо да реагираат, молчат или, како што вели, „активно учествуваат во прикривање на доказите“.
„Вчера во 14:44 Чаир поднесе поништување на решението кое го издале со фалсификувани документи. документот е антидатиран за да изгледа дека постапиле порано, но вистината е дека реагирале откако ние поднесовме пријави во МВР“, напиша Арсовска.
Од општина Чаир, пак, возвратија со тврдење дека се соочуваат со „опсада“ и политички напади кои, како што велат, потсетуваат на урбаниот пристап од пред четири децении, алудирајќи на груби интервенции од времето на поранешна Југославија.
