Пластиката течеше како лава – раскажаа пожарникарите за пожарот во Осиек
Пожарот во Осиек во Хрватска е ставен под контрола, а растопената пластика течеше како лава.
Пожарот кој вчера избувна во Осиек сега е ставен под контрола, но чадот околу местото на пожарот уште не стивнува. Ветерот е значително ослабен, па чадот не оди високо во воздухот туку се задржува блиску до земјата, што уште повеќе ја отежнува работата на пожарникарите.
Од противпожарната служба соопштија дека пожарот го гаселе околу 200 пожарникари од 44 противпожарни станици и дека во интервенцијата учествувале 100 возила.
Шефот на противпожарната бригада на Осиек-барањската жупанија Зоран Пакшец откри дека во текот на ноќта дежурале 20 пожарникари за да спречат ширење на пожарот, како и 10 противпожарни возила.
„Моравме да истуркаме дел од пластиката за да го заштитиме предметот. Пластиката течеше како лава. Оваа стопена пластика ги загрози и цевките и камионите, моравме многу да внимаваме на пластиката што не палеше оддолу, а не ни знаевме. Токму ова беше една од причините поради која мојот колега, се повреди во течната пластика. Денеска ќе биде пренесен во Загреб, се надевам дека е стабилен“, рече тој, а пренесува Јутарњи лист.
Нема нови препораки за граѓаните, освен вчерашните препораки мештаните што помалку да останат на отворено и да носат маски.
Шефот на противпожарната служба, Горан Ивковиќ, најави дека пожарникарите го држат пожарот под контрола и дека во соработка со работниците на компанијата „Драва Интернационал“ ќе се обидат да го покријат местото на пожар со земја и со тоа да го забрзаат процесот на запирање на ширењето на чад.
