Петровска: Нашите припадници во Вермонт и Криволак создадоа нераскинлива врска која ги надминува границите на партнерството
Зад нас се неколку големи вежби кои беа навистина успешни, а веќе сме во фаза на планирање на следните заеднички вежби, кои ќе бидат уште поголеми и позначајни за нашиот заеднички развој, ова го рече на прес конференција министерката за одбрана Славјанка Петровска пречекувајќи го генерал-мајор Грегори Најт.
„Со Вермонт развивме и одлична соработка во областа на военото образование. Наши питомци беа дел од Универзитетот Норвич и имајќи предвид дека и Универзитетот и Воената академија во Скопје изразија јасен интерес за продолжување на соработката, немам сомнеж дека набрзо ќе можеме да го отвориме новото поглавје и во оваа област. Сакам да ви порачам – Северна Македонија е ваш сојузник на кој можете да се потпрете. Гледајќи кон иднината, исполните сме со оптимизам и верба. Нашето партнерство достигна големи височини. Ние сме еден тим кој е докажано способен да одговори на сите предизвици. Ако ја имаме предвид посветеноста кон нашите цели, нема граница на она што можеме заеднички да го постигнеме“, изјави министерката за одбраа Славјанка Петровска.
Оваа година се одбележува 30-години партнерство помеѓу Армијата на Република Северна Македонија и Националната гарда на Вермонт. Припадници на македонската Армија и на Националната гарда на Вермонт имаат спроведено голем број заеднички обуки на кои досега учествувале над 1.800 припадници на Армијата. Во 2012 година, со цел унапредување на односите и соработката и постигнување на особено значајни остварувања на Националната гарда на Вермонт и беше доделен Орден за воени заслуги.
