Петровска: АНБ лаже дека треба судска одлука, законот дозволува итна декласификација ако се крие криминал
Пратеничката на СДСМ, Славјанка Петровска, денеска ја обвини власта дека со нецелосни и конфузни информации се обидува да го злоупотреби и манипулира случајот во Агенцијата за национална безбедност (АНБ). Таа побара итна декласификација на целата документација, тврдејќи дека АНБ може и мора веднаш да го стори тоа, особено ако наводите за криминал се точни.
„Докази нема, детали нема, само штуро соопштение и бледи изјави кои упатуваат на скриените мотиви на власта, а тоа е овој случај да го злоупотребат и да го претворат во манипулација,“ изјави Петровска.
Таа директно ја отфрли изјавата од АНБ дека за декласификација е потребна судска одлука, нарекувајќи ја лага. Петровска се повика на два члена од Законот за класифицирани информации, тврдејќи дека тие овозможуваат итна акција.
„Законот вели дека ‘тој што класифицира, тој и декласифицира’“. Таа го цитираше членот 14, кој вели дека промената на степенот на класификација ја врши создавачот на информацијата.
Уште поважно, Петровска го истакна членот 20 од истиот закон, според кој информацијата нема да се смета за класифицирана ако со неа се прикрива кривично дело, пречекорување или злоупотреба на функцијата.
„Значи, ако се земат предвид сите претходни изјави од власта, за наводна злоупотреба и незаконско работење, овој член овозможува итна декласификација, без изговори и одолговлекувања,“ заклучи таа.
Како втор чекор, пратеничката побара итно свикување на собраниската Комисија за надзор над работата на АНБ за да се изврши увид во декласифицираните документи. Според неа, со декласификацијата се надминува и пречката со немањето безбедносен сертификат на претседателот на комисијата.
Петровска обвини дека владејачката ВМРО-ДПМНЕ „пушта магла“ со овој случај за да се заборават досегашните скандали и да се создаде изговор за спојување на Агенцијата за национална безбедност и Агенцијата за разузнавање. Таа предупреди дека власта нема капацитет за таква сложена реформа, која доколку не се спроведе како што треба, може да предизвика „несогледливи последици за државата“.
„АНБ е столб на националната безбедност… и не смее да се дозволи нејзина окупација и злоупотреба, бидејќи тоа е ризик и закана за безбедноста на земјата и рушење на столбовите на државноста“, заклучи Петровска.
