ОД ОВА МЕСТО ИЗЛЕГУВААТ ИДНИТЕ ЛИДЕРИ НА МАКЕДОНИЈА: Воената академија прослави 30 години
Воената академија „Генерал Михаило Апостолски“ денеска во касарната „Гоце Делчев“ во Скопје со свеченост ја одбележа 30-годишнината од своето основање. На настанот присуствуваа министерот за одбрана Владо Мисајловски и началникот на Генералштабот на Армијата, генерал-мајор Сашко Лафчиски.
Министерот Мисајловски истакна дека военото образование е столбот на кој се градат офицерските и подофицерските кадри. Тој порача дека академијата во изминатите три децении прераснала во значајна високообразовна институција не само во државата туку и во регионот. Успехот, според него, се должи на посветеноста на образовниот кадар кој ги гради младите питомци во професионалци подготвени за лидерски улоги.
„Академијата преку своите наставни програми во чии рамки се изучуваат и лидерските способности на личности како генерал Апостолски и други значајни личности од македонската историја, поставува цврсти темели за едукација на кадри подготвени да го следат заветот на нашите национални херои“, рече министерот.
Тој го нагласи и регионалниот карактер на Академијата, која преку едукација на питомци од соседните земји ја зајакнува соработката и дијалогот и создава мрежа на идни офицери подготвени за интероперативност. Мисајловски му честиташе на новиот декан, полковникот Ненад Танески, и му се заблагодари на досегашниот декан, полковникот Митко Богдановски, за неговиот придонес.
Новиот декан, полковникот Танески, истакна дека во овие 30 години, Академијата се изградила како единствена воена високообразовна институција во државата. Тој посочи дека од првите генерации до денес, низ обуката поминале 1.234 питомци, од кои 74 странци од НАТО и партнерските земји, кои станале офицери, лидери и врвни професионалци.
Во рамките на свеченоста беше промовирана и монографијата „30 години Воена академија“, дело кое ја обележува историјата и достигнувањата на институцијата.
