Петнаесетти протест: Граѓаните бараат трајно решение за дивата депонија Вардариште!
Граѓаните и денеска попладне излегоа на протест и повторно го блокираа мостот „Близнаци“ меѓу општините Аеродром и Гази Баба, со барање надлежните институции конечно да најдат трајно решение за дивата депонија Вардариште.
Насобраните, обединети преку иницијативата „Стоп за Вардариште“, извикуваа пароли како „Чист воздух, сега“ и „Барате власт, нема кога нè храните со отров“, упатувајќи критики дека институциите не преземаат мерки за заштита на здравјето на граѓаните.
Ова е петнаесетти протест на истата локација, откако на крајот на август избувна голем пожар на Вардариште, по кој скопјани со денови дишеа чад и мирис на изгорено ѓубре.
Присутните посочија дека и покрај нивните апели, ниту едно надлежно тело – Министерството за животна средина, Град Скопје, општините Гази Баба и Аеродром или инспекторатите не презело конкретни активности за затворање на депонијата.
„Депонијата која требаше одамна да биде затворена сè уште работи, а секоја вечер околу полноќ во воздухот се чувствува неподнослива миризба. Бараме институциите да постапат согласно своите надлежности“, рекоа дел од граѓаните, пренесе ТВ Телма.
Протестот заврши со марш на присутните по булеварот „Србија“.
ФОТО: 360 степени
