Пензионерите најавија протест пред Уставен суд во понеделник: Бараат линеарно зголемување на пензиите
Пензионерите кои се залагаат за линеарно зголемување на пензиите денеска од Штип порачаа дека на 1 декември, понеделник, ќе одржат протест пред Уставниот суд во Скопје. Целта, како што наведуваат, е да се изборнат за продолжување на линеарното усогласување на пензиите. На прес-конференцијата побараа масовна поддршка од пензионерите ширум државата.
Пензионерот Зоран Трајков изјави дека протестот ќе започне во 11 часот и дека се очекува присуство на пензионери од сите градови во Македонија. Неговиот колега од Свети Николе, Трајче Станојков, најави дека доколку протестот не даде резултати, демонстрациите ќе продолжат на 10 декември, бидејќи – како што рече – нема да се откажат од своите барања. Освен линеарно зголемување на пензиите, ќе бараат и К-15, повисока посмртнина и воведување пензионерска картичка.
Трајче Митев од Штип истакна дека бараат зголемување на посмртнината од сегашните 35.000 на 50.000 денари, како и создавање фронт за воведување на пензионерска картичка.
На денешниот собир присуствуваа пензионери од Штип, Свети Николе, Скопје и Куманово. Пензиионерката Вера Јовановска порача дека ќе продолжат да се борат против, како што рече, дискриминацијата и дека бараат линеарно зголемување кое ќе важи за сите.
Пензионерите веќе добија линеарно покачување од 5.000 денари, во септември на картичка им биле исплатени дополнителни 1.000 денари, а во март следната година е најавено ново усогласување во иста висина.
