„Пелистер не го заслужува ова – по четврти пат сме грубо оштетени!“ (ФОТО)
Битолчани сметаа дека се жртва на срамно и скандалозно судење овојпат во режија на судиската тројка од Тетово, предводена од главниот судија Јосип Бартон. Сега тоа било на дуелот против Воска (1-2), а претходно против Караорман, Детонит Плачковица, Гостивар…
„Самото делегирање на судија кој не е од рангот на интернационалци остава дилеми и делува потценувачки за натпревар со ваков влог и важност. Од сите македонски судии одговорните делегираа судија кој сезонава е целосно надвор од форма, воопшто не суди натпревари од Првата и Втората лига, туку само натпревари од младинските лиги и футсал шампионатот. Делегираниот судија во Првата и Втората лига сезона најчесто е четврти судија, а делегиран за главен е најчесто кога играат пионери и кадети. Зарем Бартон беше најдобриот избор за овој натпревар? Критериумот на главниот судија Бартон на денешниот натпревар е навредлив кон нашиот клуб, кон нашите фудбалери, обидот да се надигруваме и да се наметнеме со нашиот стил на игра. Со ваков третман кон македонскиот фудбал, кон дерби дуел на две екипи со високи амбиции и вложувања и кон клуб како Пелистер, не сме на прав пат како фудбалски систем“, се вели меѓу другото во соопштението на зелено-белите.
По овој пораз Пелистер заостанува пет бода зад третопласираниот Гостивар, седум зад Воска Спорт и девет зад водечкиот Вардар. До крајот на сезоната има уште девет кола, а пласман во елитата директно обезбедува првопласираниот, а вториот и третиот ќе играат бараж.
