Пелистер ја избегна судбината на Вардар – со големи три бода се враќа од Кавадарци
Пред две недели, во салата „Јасмин“ падна Вардар, но битолчани очигледно добро се подготвија за тоа што ги очекува и славеа со 24-21 за максимален ефект во плејофот. Тиквеш настапи без најдобриот стрелец во Суперлигата од претходните две сезони Страхиња Симиќ, додека Ани Обина, кој на претходниот меч доживеа повреда, сега имаше мала минутажа и не постигна ниеден гол. Кај Пелистер недостасуваа Костески и Атанасијевиќ.
Дури и без своите најдобри играчи, Тиквеш долго време се одржуваше во игра. Пелистер првпат се одлепи на +4 (11-7) во 22. минута од мечот, а на полувреме се замина со 12-10 за гостинскиот тим. Во вториот дел, битолчани најчесто беа на +2 со тоа што Тиквеш не дозволуваше противникот резултатски да се одлепи и ја задржа неизвесноста до крајот. Домашните ракометари неколку пати имаа можност и да израмнат, но не ги искористија своите шанси и Пелистер мирно го приведе мечот кон крајот.
Богдан Радивојевиќ со седум гола беше најефикасен кај Пелистер и воопшто на мечот, а Кузмановски додаде пет. Исто толку, во домашниот тим постигнаа Анастасовски и Мијатовиќ.
