ПАРЛАМЕНТОТ НА РЕПУБЛИКА СРПСКА ГО НЕГИРА ГЕНОЦИДОТ ВО СРЕБРЕНИЦА: Велат дека го подигнуваат нивото на национална свест
Се создаваат тензии во Босна и Херцеговина(БиХ). Парламентот на Република Српска го поддржа извештајот со кој се негира геноцидот во Сребреница.
Во извештајот се негираат судски утврдените факти за геноцидот извршен врз Бошњаците во Сребреница во 1995 година, а тие одлучија да го сторат тоа со цел да ја оспорат резолуцијата за осуда на злосторството во Сребреница, која се очекува да биде усвоена во мај од Генералното собрание на ОН.
„Со ова го подигнуваме нивото на нашата национална свест“, рече претседателот на Народното собрание на РС, Ненад Стевандиќ.
Лидерот на босанските Срби, Милорад Додик потврди дека ова е одговор на најавата за усвојување на резолуција со која Обединетите нации ќе воведат ден за сеќавање на жртвите од геноцидот во Сребреница.
Германија и Руанда се формални предлагачи на резолуцијата со која се бара одбележување на 11 јули како ден на сеќавање на жртвите од геноцидот во Сребреница.
Здружението на жртви и сведоци на геноцид и Здружението „Движење на мајките од енклавите Сребреница и Жепа“ бараат од правосудните институции во Босна и Херцеговина(БиХ) да ги гонат српскиот претседател Александар Вучиќ и претседателот на босанскиот ентитет Република Српска, Милорад Додик, за негирање на геноцидот.
Велат дека изјавите на двајцата политичари биле скандалозни.
Во јули 1995 година, во Сребреница е извршен геноцид врз Бошњаците. Се проценува дека силите на Армијата на Република Српска убиле повеќе од 8.000 бошњачки мажи и момчиња во и околу градот за само неколку дена.
