Парите за закуп за терминалот Александруполи ќе пропаднат?
Терминалот за течен природен гас (ЛНГ) во грчкиот град Александруполи од вторникот започна со комерцијална работа, преку кој низа земји од југоисточна и централна Европа ќе се снабдуваат со природен гас, но засега не и Македонија која има платено за закуп помеѓу 2,5 и 3 милиони евра, според министерката за енергетика Сања Божиновска.
Од „Гастрејд“, компанијата-оператор рекоа дека станува збор за еден од најважните енергетски проекти на европско, регионално, национално и локално ниво и ќе придонесе за енергетската безбедност и развој, за диверзификација на изворите и рутите за снабдување со енергија на Југоисточна и Централна Европа
– Конечно почнал да работи Александропули и ние сме многу среќни за тоа, но на жалост кога побарав извештај од ЕСМ, можам да ви прочитам дека ЕСМ нема учество во сопственоста на терминалот – предвидено било „Номагас“ да се стекне, но тоа уште не е реализирано. Предвидено е да учествуваме и со 25 отсто во гансата централа, меѓутоа и тоа не беше реализирано, така што ние немаме ништо од Александропулу. Единствено што имаме е договор за користење на капацитет, потпишан на 15 години, и досега имаме платено околу 2,5 до 3 милиони евра. Тоа се пропаднати пари. За се што сакаме понатаму да направиме, треба да дискутираме, меѓутоа ситуацијата сегашна е таква, рече денеска Божиновска.
Во овој контекст, таа дополни дека Македонија нема интерконектор за гасно поврзување со Грција. Тендерот по девет месеци од повикот за оператор за негова изградба пропадна поради забелешка на меѓународниот кредитор. Министерката се надева дека новата тендерска постапка ќе трае пократко и ќе има резултат.
Божиновска во продолжение додаде дека за проектот Чебрен на Црна Река ќе се прави физибилити студија за тоа како да биде реализиран.
– Тоа е еден сериозен проект за кој се потребни многу средства и мора овој пат да дискутираме ние како држава да имаме најголем бенефит. Тој е во план, но потребно е многу време. Секако не може да се направи за многу брзо. Прво треба да се направи физибилити студија како да биде најдоброто решение за граѓаните, порача таа.
