Пандов за затворите: Телефон немаат само оние којшто не сакаат да имаат телефон
Во македонските затвори и понатаму постои сериозен проблем со корупција и недозволени предмети, призна в.д. директорот на Управата за извршување санкции, Александар Пандов.
На денешната Меѓународна научна конференција организирана од Факултетот за безбедност – Скопје, Пандов истакна дека во изминатата година, откако ја води Управата, имал бројни средби со обвинители и судии и дека несомнено е дека во затворскиот систем постои корупција.
„Од она што го видов овие година дена во затворите, можам да кажам дека буквално имало системска корупција. Меѓутоа, постои и огромен процент луѓе кои ја сакаат работата и не сакаат да сме на ова ниво со корупција. Не може една институција сама да ја уништи системската корупција“, рече Пандов.
Тој посочи дека иако верува оти системската корупција е намалена во изминатата година, таа сè уште не е искоренета.
Посебно алармантен, според него, е бројот на мобилни телефони кај затворениците.
„Во одредени затвори бројките се поразителни за мене, за тоа колку мобилни телефони имаат затворениците. Јас од позиција на в.д. директор на Управата за извршување санкции можам да правам контроли, меѓутоа борбата против корупцијата во самите затвори е на директорите на затворите и на затворската управа. Можам да посочам одреден број затвори каде што со кого сакате да викнеме да ги направат претресите, јас ве уверувам дека нема да најдеме ниту еден или еден-два телефони. Tочно е дека во одредени затвори нема телефон само оној којшто не сака да има телефон“, рече Пандов.
