Панчевски со документ ја демантира одлуката на Советот на обвинители: „Имам над 12 години стаж“
Поранешниот претседател на скопскиот Кривичен суд, Владимир Панчевски, експресно реагираше со материјален доказ откако Советот на јавни обвинители денеска ја одби неговата кандидатура за државен јавен обвинител.
Советот ја отфрли кандидатурата на Панчевски со образложение дека тој не го исполнува законскиот услов од 10 години непрекинат работен стаж како судија или обвинител во областа на кривичното право.
Сепак, Панчевски на својот Фејсбук профил објави официјална потврда издадена од Основниот кривичен суд Скопје, која директно ја оспорува ваквата одлука.
Во потврдата, потпишана од судскиот администратор Дејан Нешовски, децидно стои дека Панчевски бил судија во периодот од 08.02.2008 до 28.07.2020 година.
Заедно со документот, Панчевски упати и емотивна порака до јавноста, нарекувајќи ја својата кандидатура „трка за правда“.
Останува отворено прашањето дали по јавното објавување на овој документ, Советот на јавни обвинители ќе ја преиспита својата одлука или ќе понуди дополнително објаснување за дисквалификацијата на Панчевски.
