Јовиќ: Промашивме многу чисти ситуации, овој меч нека биде поука
Пелистер со тежок пораз пред своите навивачи од Колстад го почна настапот во Лигата на шампионите. Битолскиот тим загуби со девет голови разлика, 31-22. Јовиќ е разочаран, но верува дека ќе биде подобро.
„Лошо го отворивме натпреварот. Имавме голема желба, бевме борбени, не заслуживме пораз од девет разлика, тоа се должи на многуте промашени чисти ситуации од кои мора да се реализира. Тие во нивната анализа имаа посебно внимание обрнато на затварање на нашите пикери. Овој натпревар треба да ни биде поука за понатаму и едно големо искуство“, вели тренерот Јовиќ.
„Сепак мислам дека сме на добар пат, имаме нови играчи и потребно ни е време да се воиграме. Верувам во играчите, верувам во екипата и прашање на време е кога ќе го направиме тој исчекор да ги оствариме целите за оваа сезона“.
Пикерот на битолскиот тим, Жарко Пешевски вели дека од следниот меч мора да играат на многу повисоко ниво за достоинствено да го претстават градот и земјата.
„Колстад беше подобар тим од нас. Ние направивме многу технички грешки и промашивме многу чисти шутеви. Но, ние сме нови во ова натпреварување, сакаме да бидеме подобри, мораме да бидеме подобри, мора да дадеме гас од следниот меч, мора достоинствено да ја претставуваме нашата земја и нашиот град“, вели Пешевски.
