Мицкоски: Разочаран сум што само 210 од „200.000 Бугари во Македонија“ се пријавиле за гласање
Премиерот Христијан Мицкоски изрази разочарување од малиот број на пријавени граѓани за гласање на претстојните избори во Бугарија. И покрај често споменуваната бројка од страна на бугарските власти за постоење на 200.000 Бугари во Македонија, официјалните податоци покажуваат драстично помалку пријавени гласачи.
„Разочаран сум од тоа што само 210 македонски Бугари се пријавиле да гласаат на изборите во Бугарија, од оние ‘200.000 според Радев’“, изјави премиерот Мицкоски, одговарајќи на новинарско прашање поврзано со изборниот процес кај нашиот источен сосед.
Во однос на очекувањата за исходот од изборите во Бугарија, премиерот нагласи дека Македонија се надева на партнер кој ќе биде насочен кон европските вредности и заедничката иднина.
„Се надевам дека граѓаните на Бугарија ќе изберат премиер кој е проевропски и продобрососедски ориентиран и ќе биде промотор на Копенхагеншките критериуми, а не на билатерални прашања од средниот век“, заклучи Мицкоски.
