ЈОТОВА НЕ ОДГОВОРИ ДИРЕКТНО ДАЛИ ЌЕ ИМА СРЕДБА МУЦУНСКИ-ПЕТРОВА Бугарија била отворена за разговор, „но без ултиматуми“
Вршителката на должноста претседателка на Бугарија, Илијана Јотова, изјави дека Софија „останува отворена за разговори со Северна Македонија“, но порача дека тие треба да се водат „без ултиматуми и без да се отстапува од европската политика“.
– Бугарија е полноправна членка на Европската Унија и не можеме да дозволиме држава која тргнала по европскиот пат да не ги прифаќа вредностите и доблестите на ЕУ – изјави Јотова пред новинарите во Благоевград.
Таа рече дека сè уште не ги знае деталите од разговорот меѓу премиерот Христијан Мицкоски и претседателката на Европската комисија, Урсула фон дер Лајен.
– Јас сè уште не ги знам деталите од разговорот во четири очи со госпоѓа фон дер Лајен. Многу се надевам дека овојпат таа била исклучително цврста – рече Јотова.
На прашање за барањето за средба меѓу министрите за надворешни работи на двете земји, Јотова изрази сомнеж во искреноста на Скопје за продолжување на дијалогот, бидејќи, како што рече, веќе трет месец нема одговор од претседателката Гордана Сиљановска-Давкова на писмото што лично ѝ го испратила.
Јотова, сепак, остави простор за средба.
– Да останеме умерени оптимисти. Ќе разговарам со нашата министерка за надворешни работи Велислава Петрова, сакам точно да го видам и текстот на нотата и како е формулирана – рече Јотова.
Јотова порача дека, за разговорот со Софија да биде сериозен, Мицкоски треба добро да ја прочита европската политика во однос на проширувањето.
– Многу добро господин Мицкоски треба да ја прочита европската политика во однос на проширувањето на Република Северна Македонија, да заборави дека ова е билатерално прашање, како што тој се обидува да го претстави – рече таа.
Според неа, за околу две недели пред Европската комисија ќе биде разгледан извештајот за напредокот на Северна Македонија во пристапувањето кон ЕУ.
Јотова додаде дека пред сè би сакала да се реши прашањето со Ива Михајлова, за кое, како што рече, Бугарија се обратила до „највисоките европски и светски институции“.
.
Извор: plusinfo.mk
