Oткази поради вештачката интелигенција – дали вашата работа е во опасност?
Загриженоста за влијанието на вештачката интелигенција врз пазарот на трудот повторно се покрена по изјавата на извршниот директор на Amazon, Енди Џеси. Како што објави CNBC, во интерно писмо до вработените од 17 јуни, Џеси објави дека Amazon ќе го намали бројот на вработени во корпоративниот сектор во наредните години – поради „добивките во ефикасноста што ги носи вештачката интелигенција“.
„Како што сè повеќе воведуваме генеративна вештачка интелигенција и агенти, начинот на кој се извршуваат работите ќе се промени. Ова значи дека ќе ни требаат помалку луѓе за одредени работни места отколку денес, но и повеќе луѓе за некои други видови работни места“, вели тој.
Оваа изјава доаѓа во време кога многу големи технолошки компании веќе го намалуваат бројот на вработени, а влијанието на технологијата за вештачка интелигенција сè повеќе го менува начинот на водење бизнис.
Според извештајот на Светскиот економски форум објавен претходно оваа година, дури 48 отсто од работодавците во САД планираат да го намалат бројот на вработени поради вештачката интелигенција.
Не сите неодамнешни отпуштања се директно поврзани со технологиите за вештачка интелигенција, но примерите од индустријата укажуваат на јасен тренд. Во мај, Мајкрософт објави отпуштање на 3 отсто од своите работници, додека Гугл им понуди на вработените уште една рунда доброволни заминувања преку својата „програма за доброволно напуштање“.
Шведската финтех компанија Кларна го намали бројот на вработени за дури 40 отсто, токму благодарение на решенијата за вештачка интелигенција, потврди извршниот директор на компанијата, Себастијан Сијемјатковски. Слично на тоа, основачот на Shopify, Тоби Лутке, изјави дека компанијата повеќе нема да вработува нови луѓе освен ако не се докаже дека вештачката интелигенција не може да ја заврши работата.
Според Кејт Листер, претседател на консултантската фирма Global Workplace Analytics, влијанието на вештачката интелигенција неизбежно ќе доведе до трансформација на пазарот на трудот на долг рок.
foto freepik.com
/faktor.mk
