ОТКАЖАНИ СЕ 20 ЛЕТОВИ, АЕРОДРОМОТ НЕ Е ЗАТВОРЕН Маглата предизвикува проблеми на скопскиот аеродром

Поради маглата во Скопската котлина, на Меѓународниот аеродром Скопје има намалена видливост што резултираше авиокомпаниите да откажат 20 лета и да пренасочат 1 лет во периодот од полноќ до пладне, соопшти ТАВ Македонија.

„По 11 часот слетаа авионите од Дортмунд и од Виена, а се очекува да полета авионот за Хамбург. Согласно временската прогноза која ни стигнува од метеослужбата на М-НАВ, намалена видливост се очекува и во преостанатиот дел од денов, како и во текот на утрешниот ден. Сепак, со оглед на тоа што временските услови се менуваат постојано и секоја авиокомпанија има свој праг на толеранција на намалена видливост, апелираме до сите патници да ги следат информациите и насоките за нивните летови кои ги добиваат од нивната авиокомпанија. За патниците и јавноста повторуваме – Меѓународниот аеродром Скопје не е затворен“ информира ТАВ МАкедонија.

Аеродромот е отворен, без разлика на временските прилики, се додава во соопштението.

„Нашиот персонал, со нашата аеродромска опрема и аеродромски системи се подготвени да ги услужат и авионите и патниците. Би сакале да појасниме дека аеродром се затвора само со посебна одлука при што се испраќа авијациска порака НОТАМ до сите чинители во авиосообраќајот, а тоа се прави само во исклучителни ситуации кога некој капацитет на аеродромот поврзан со опслугата на авионите не е во функција или пак ако станува збор за општа вонредна состојба. На Меѓународниот аеродром Скопје сите капацитети му се во функција, оттука ние сме отворени за авиосообраќај. Во сите случаи со магла, аеродромот не се затвора, туку е отворен. Притоа чекаме метео-службата на М-НАВ, како институција во чија надлежност се навигациските системи во авиосообраќајот, да нè извести дека има подобрување на временските прилики – и нас како аеродромски оператор и авиокомпаниите, чии пилоти ги носат одлуките дали ќе слетаат или ќе се пренасочат на друг аеродром, зависно од моменталната минимална видливост која самата авиокомпанија одлучила дека ја прифаќа“, се вели во соопштението од ТАВ Македонија.

Персоналот на аеродромот работи 24/7, пултот за информации е подготвен да одговори на сите прашања поврзани со промени во редовниот распоред на летовите, како физички, така и на телефонската линија + 389 2 3148 333.

.