Ѓорѓиевски ги посети малите херои на клиниките во Скопје: Новогодишна радост за најмалите, но најголеми херои!
Град Скопје и градоначалникот Орце Ѓорѓиевски денеска ги посетија децата кои се на лекување во Универзитетската клиника за белодробни заболувања кај деца – Козле, Универзитетската клиника за детски болести и Универзитетската клиника за детска хирургија во Скопје.
Со новогодишни пакетчиња и подароци, градоначалникот и тимот на Град Скопје се обидоа да им донесат насмевка, топлина и чувство на поддршка во овие тешки моменти. „Оваа посета е израз на длабока грижа и поддршка за најмалите херои, кои секојдневно водат свои храбри битки“, истакна Ѓорѓиевски.
Тој посочи дека ваквите иницијативи имаат цел да внесат радост, надеж и утеха во срцата на децата и нивните семејства. „Верувам дека хуманоста и солидарноста се наша заедничка обврска. Грижата за децата, особено за оние на болничко лекување, мора да биде траен приоритет и доказ за зрелоста на едно општество“, додаде градоначалникот.
Преку оваа активност, градот испрати силна порака дека ниту едно дете не е заборавено и дека заедно може да се гради посилно, похумано и поодговорно утре. На сите малечки им беше посакано брзо и успешно закрепнување.
