Општина Центар ќе го затвори Дебар Маало за сообраќај за викендите – нов режим со рампи и казни!
Од петок во 18:00 часот до понеделник во 06:00 часот наутро, скопското Дебар Маало ќе биде затворено за сообраќај, како дел од новото сообраќајно решение на Општина Центар кое има за цел да стави крај на хаосот со паркирањето и метежот за време на викендите, пишува СДК.МК
Според информациите, во првата фаза ќе се постават рампи на четири влезни точки: улиците Орце Николов, Ленинова, 29 Ноември и булеварот Климент Охридски. Жителите ќе влегуваат со посебни картички, а сите други ќе можат да престојуваат најмногу 15 минути. Надминување на времето ќе се казнува со 3.000 до 6.000 денари.
„Во моментов за викендите во Дебар Маало владее хаос. Нема место за паркинг и џабе со колите се вртат кругови низ улиците. Сообраќајот е целосно закрчен, а пешаците немаат каде да се движат“, велат од Општина Центар, објаснувајќи ја потребата од новиот режим.
Дополнително, ќе биде воспоставен и ограничен режим за камионите за дотур на стока, кои ќе можат да влегуваат само од 07:00 до 09:00 часот наутро. Прекршувањата ќе бидат санкционирани.
Општината уверува дека нема законски пречки за воведување на ваквиот систем, бидејќи не се ограничува слободата на движење, туку се регулира престојот и паркирањето на возилата.
Во моментов се чека одобрување од Министерството за внатрешни работи и од Град Скопје, по што ќе се пристапи кон имплементација на решението.
