ОПЕК ПОРАЧА: Жалиме за намалувањето на инвестициите во производството на нафта
ОПЕК жали за намалувањето на инвестициите во производството на нафта во одредени делови од светот, вклучително и Соединетите Американски Држави, изјави генералниот секретар на организацијата Хаитам ел Гаис на меѓународната енергетска конференција CERAWeek во Хјустон, Тексас.
Според него, намалувањето на инвестициите во САД се должи и на влијанието на факторите на животната средина.
Тој на конференцијата најави и дека нафтата и во иднина ќе ја задржи улогата на критична компонента на енергетскиот пазар.
Ел Гаис нагласи и дека членките на ОПЕК веруваат дека побарувачката за нафта оваа година ќе се зголеми за 2,3 милиони барели дневно, а најголем дел бараат азиските земји, вклучително и Индија и Кина.
Секретарот прецизираше дека од овие 2,3 милиони барели, побарувањата на Кина ќе изнесуваат околу 600 илјади барели.
На состанокот на почетокот на декември минатата година, Алијансата ОПЕК плус потврди дека сегашните параметри на договорот ќе останат на сила, односно дека производството на нафта ќе продолжи да се намалува за два милиони барели дневно.
Во мај 2020 година, ОПЕК плус го намали производството на нафта за 9,7 милиони барели дневно поради падот на побарувачката за овој енергетски производ поради пандемијата. Од август минатата година, алијансата премина во последната фаза на напуштање на тоа намалување, но од ноември повторно го намали производството за два милиони барели дневно во однос на нивото што беше максимално до август.
Потписниците на договорот ја образложија одлуката со неизвесноста на прогнозите на светската економија и соодветно на тоа, изгледите за намалување на побарувачката на нафта.
На крајот на октомври минатата година, генералниот секретар на ОПЕК Хајтам Ел Гаис објави дека ОПЕК плус предвидува вишок понуда на пазарот на нафта во четвртиот квартал од минатата година и на почетокот на оваа година, поради што повторно беше одлучено да се намали производството.
