ОН: Во Сирија речиси 9 милиони луѓе погодени од земјотресот
Околу 8,8 милиони луѓе во Сирија беа погодени од разорниот земјотрес што ја погоди земјата на 6 февруари, соопштија денеска ОН.
„Се предвидува дека на повеќето ќе им биде потребна некаква хуманитарна помош. ОН ќе сторат повеќе за да им помогнат на сите Сиријци“, напиша Најат Рочди, заменик претставник на ОН за Сирија, на Твитер.
Активистите и хуманитарните работници во северозападните области на Сирија под контрола на бунтовниците се жалат дека помошта на ОН во тие области по земјотресот била недоволна. Координаторот на ОН за итна помош Мартин Грифитс призна дека ОН не успеале да им помогнат на настраданите од земјотресот во споменатите делови на земјата.
Како причина се наведуваат бирократските пречки, а набљудувачите тврдат дека помошта на ОН би можела побрзо да стигне до жртвите во воените зони доколку се користеа помали возила, наместо огромни камиони, кои беа тешко достапни по уништените патишта.
Од земјотресот, повеќе од 140 камиони со помош на ОН пристигнаа во бунтовничката област во северозападна Сирија. Во моментов, на луѓето најмногу им требаат шатори. На тој простор делумно или целосно се уништени околу 9.000 згради, а 11.000 луѓе останаа без своите домови.
