Олмо веднаш проработе, Барса по шест години го победи Рајо во Мадрид (ВИДЕО)

Интересно е тоа што сите три победи во досегашниот дел од Ла Лига, Барса ги оствари со идентичен резултат, 2-1, како и тоа што првпат по 2018 година го победи Рајо Ваљекано на гостински терен. До победата каталонскиот тим дојде со пресврт, како на првото гостувањето во сезоната, кај Валенсија. По првите 45 минути Рајо водеше со голот на Лопез, постигна уште во деветтата минута, а пресвртот почна по еден час игра.

Одбраната на домашниот тим почна да ја губи концентрацијата и Барса лесно создаваше шанси, па Педри израмни на 1-1 откако остана само на десетина метри од голот на Рајо. Во 71. минута погоди и Левандовски, но главниот судија го поништи голот по прегледувањето на ВАР снимката поради наводен фаул од Кунде на почетокот од акцијата иако е впечаток дека такво нешто не постоеше.

Сепак, тоа што ѝ беше одземено на Барса, го врати Дани Олмо во своето деби за матичниот клуб. Шпанскиот репрезентативец влезе во игра на почетокот од второто полувреме на местото на Феран Торес и во 82. минута го комплетираше пресвртот на својот тим.