Одобрено и второто обвинение за трагедијата во „Пулс“, на „реалниот сопственик“ ќе му суди судијката Биљана Смаќовска

Основниот кривичен суд Скопје во целост го одобри и второто обвинение поврзано со трагичниот пожар во кочанската дискотека „Пулс“, кое се однесува на едно лице идентификувано како „реален сопственик“ на фирмата за обезбедување. Предметот е веќе распределен на понатамошно постапување кај судијката Биљана Смаќовска.

Според соопштението на судот, Советот за оценка на обвинителен акт донел решение со кое целосно го прифаќа актот поднесен на 4 септември против лицето А.Н.. Како што претходно информираше Јавното обвинителство, станува збор за одговорното лице и реален сопственик на правното лице „Друштво за обезбедување на имот и лица РУБИКОН СЕКЈУРИТИ СОЛУШН“. Тој се товари за кривичното дело „Тешки дела против општата сигурност“.

Со одобрувањето на актот, формиран е нов кривично-правен предмет со број К.бр. 1970/25, кој преку автоматскиот АКМИС-систем е распределен кај судијката Смаќовска.

Ова е втор предмет за трагедијата во Кочани, откако претходно беше одобрено и првото, групно обвинение против 34 физички и три правни лица, кое беше доделено кај судијката Диана Груевска Илиевска.

Од Основниот кривичен суд најавуваат дека јавноста и странките ќе бидат навремено известени за сите понатамошни чекори во постапката.