Одмор покрај река: Скопје добива модерна градска плажа
Градоначалникот на Град Скопје, Орце Ѓорѓиевски, најави дека кејот на реката Вардар ќе добие нов лик преку проект за изградба на нова градска плажа и целосна реконструкција на постојната спортска инфраструктура. Според неговите најави, со засилено темпо се работи на уредување на овој простор со цел тој да стане функционална и модерна зона за рекреација на сите генерации.
Проектот предвидува обнова на спортските терени за фудбал, одбојка на песок и кошарка, како и поставување на нови фитнес-зони на отворено и современа урбана опрема. Градоначалникот потенцираше дека со овие активности се опфатени и терените во Маџир Маало, кои ќе бидат целосно унапредени.
Ѓорѓиевски истакна дека изградбата на градската плажа ќе овозможи безбедно и уредено место за одмор покрај реката, со што Скопје ќе се приближи до европските стандарди за јавен простор. Тој посочи дека ова е дел од неговите клучни приоритети, кои започнале со чистење на речното корито, а сега продолжуваат со конкретни инвестиции во спортот и здравиот живот.
Во реализацијата на проектот учествува и Министерството за спорт, а градоначалникот најави дека крајната визија е создавање на уредени спортски терени во сите општини, со цел да се обезбеди рамномерен развој и еднакви можности за сите граѓани на Скопје.
