Случај „Онкологија“: Словенечкото вешто лице и одбраната на Васев со спротивставени ставови за медицинските протоколи
Вештото лице од Словенија, Маја Равник, денеска повеќе од осум часа одговараше на вкрстени прашања во судскиот процес за случајот „Онкологија“, каде поранешниот директор Нино Васев и уште двајца лекари се обвинети за несовесно лекување.
Во текот на рочиштето, првообвинетиот Васев ја оспори анализата на вештото лице, тврдејќи дека нејзините наоди не се во согласност со македонските национални протоколи. Спорната точка се однесуваше на примената на лекот „капецетабин“, за кој Равник тврди дека нема индикација кај рак на јајници според современите европски насоки, додека Васев посочи дека во македонскиот систем овој лек се дава за 15 различни индикации врз основа на домашните упатства од 2011 година.
Равник истакна дека не правела поширока анализа на македонската литература, туку своето вештачење за 51 пациент го темели на протоколите кои важат во современата онкологија. На прашањата од Васев за конкретни случаи каде пациентите живееле подолго од очекуваниот медицински просек, вештото лице нагласи дека стои зад напишаното во вештачењето и дека терапијата мора да се спроведува според утврдени протоколи за да биде ефективна.
Одбраната го покрена и прашањето за недостигот на лекови на Клиниката, на што Равник одговори дека давањето само на еден дел од потребната комбинирана терапија (конкретно лекот „перзотумап“) нема медицински ефект доколку не се прими и вториот предвиден лек.
Адвокатот на Васев, Боби Спирковски, по сослушувањето изјави дека вештачењето е нестручно бидејќи не ги зема предвид домашните правни и медицински рамки по кои се должни да постапуваат македонските лекари. Равник претходно пред судот ги презентираше своите европски квалификации и долгогодишното искуство како началник на онколошки оддел во Марибор.
Судењето продолжува и утре со сослушување на останатите вешти лица од Словенија, а за крајот на март е најавено вклучување и на експерти од Србија.
