Одмаралиштето Пониква ќе стане центар за рехабилитација на повредените од Кочани

Одморалиштето Пониква наскоро ќе биде пренаменето во центар за рехабилитација на повредените лица од трагичниот настан во Кочани, во кој животот го загубија 62 млади лица. Владата на седница ќе ја формализира одлуката, со која објектот со 27 соби и 56 легла ќе биде адаптиран за здравствени потреби.

Од таму информираат дека во рехабилитацискиот центар ќе биде ангажиран медицински персонал кој ќе работи и на психофизичка рехабилитација, и на пружање медицинска нега со цел побрзо закрепнување на повредените граѓани.

Отворена е и директна телефонска линија со кабинетот на премиерот – 070/355-526 – на која повредените и нивните семејства можат да се јават за да ги искажат своите потреби, предлози и барања.

„Кочани и сите семејства вклучени во оваа трагедија се наш приоритет. Никој нема да биде оставен сам, ниту заборавен“, стои во соопштението од Владата, од каде дополнуваат дека веќе се обезбедени 30 милиони денари за транспорт и сместување на членовите на семејствата на повредените.

Владата најавува и целосна истрага за случајот, со цел вклучените лица да бидат изведени пред лицето на правдата, а жртвите и нивните семејства да добијат достоинствен третман.