Одложено судењето за таткото што нападна малолетни фудбалери во Штип за време на натпреварот меѓу „Шкупи“ и „Брегалница“
Во Основниот суд во Штип денеска требаше да започне судењето на 43-годишен родител, обвинет дека физички нападнал двајца малолетни фудбалери за време на натпреварот меѓу „Шкупи“ и „Брегалница“, но рочиштето беше одложено. Причина за одложувањето е барањето на неговиот бранител обвинителниот предлог да му биде преведен на албански јазик, како и да му се обезбеди симултан превод за време на целиот процес. Судењето ќе продолжи на 29 септември.
Основното јавно обвинителство Штип поднесе обвинителен предлог против 43-годишниот родител за кривично дело – Насилство, извршено на игралиштето „Бело Брдо“ на 24 август. Инцидентот се случил во 89-тата минута од натпреварот, кога судијата додели втор жолт картон и го исклучи од игра синот на обвинетиот, кој настапувал за ФК „Шкупи“.
Незадоволен од одлуката, прво синот реагирал неспортски и со удари се обидел да се пресмета со играч од ФК „Брегалница“. Во тој момент на теренот влегол неговиот татко, кој со тупаници и клоци нападнал двајца малолетни фудбалери, нанесувајќи им телесни повреди – набиеници и скршеница на нос без дислокација. Публиката брзо интервенирала и спречила поголема ескалација, информираше ОЈО.
Фудбалската федерација на Македонија (ФФМ) веднаш реагираше со дисциплински мерки. Играчот на „Шкупи“ со број девет, чиј родител е во притвор, доби најстрога санкција – исклучување од сите фудбалски организации. Двајца негови соиграчи, кои исто така учествувале во инцидентот, се суспендирани од натпревари три месеци. Казна од четири натпревари доби и 15-годишен играч на „Брегалница“, кој реагирал со груба игра и самозаштита при нападот. Казнети се и двата клуба.
