Одбраната на Деко бара куќен притвор, му било влошено здравјето
Одбраната на првообвинетиот за пожарот во Кочани, сопственикот на изгорената дискотека „Пулс“, Дејан Јованов Деко, денеска пред почетокот на рочиштето побара од судот притворот да му биде заменет со куќен притвор, поради сериозно влошена здравствена состојба.
Неговата бранителка, адвокатката Ивана Коцевска, изјави дека мерката притвор не ја исполнува својата законска цел.
„Ова не е мерка за обезбедување присуство, туку претставува казна пред судење“, нагласи Коцевска пред почетокот на рочиштето во судницата во „Идризово“.
Таа предупреди дека лекувањето во затворски услови може да има сериозни последици.
„Импровизираното третирање во затвор гарантира катастрофални последици, особено ако се земе предвид дека неговата здравствена состојба континуирано се влошува“, рече Коцевска.
Адвокатката посочи дека судот е запознаен со здравствената состојба на обвинетиот и дека тој денеска бил донесен на судење со отворена рана по неодамнешен оперативен зафат.
„Ова ги надминува сите граници на хуман третман. Неопходно е притворот да се укине и да се замени со куќен притвор. Дополнително, постои селективна примена на оваа мерка – таа важи само за двајца од вкупно 34 обвинети, иако Дејан е во најтешка здравствена состојба“, изјави Коцевска.
Судијката Дијана Груевска Илиевски истакна дека судот е целосно информиран за здравствената состојба на обвинетиот.
Таа појасни дека, со негова согласност, тој бил опериран во петокот, при што лекарите препорачале тридневно мирување.
„Тој период е поминат, поради што денеска е спроведен на судење. Од затворскиот лекар немаме поинакви информации и постапуваме согласно тие наоди“, изјави судијката.
Од Јавното обвинителство соопштија дека ги разгледуваат наводите на одбраната и дека по увид во документацијата ќе одлучат дали ќе се произнесат на крајот од денешната расправа или писмено.
Пожарот во дискотеката „Пулс“ во Кочани, кој избувна на 16 март 2025 година за време на настап на групата ДНК, однесе 63 животи и повреди над 200 лица, што го прави една од најтешките трагедии во поновата историја на земјата.
Со денешното рочиште продолжува доказната постапка, при што ќе бидат сослушани сведоци предложени од Обвинителството, кое го застапува тим од 15 јавни обвинители.
