ОД 1 ЈУНИ ПОД КАТАНЕЦ: Aлбанец ја купи куќата на убиениот Оливер Ивановиќ во Митровица
Aлбанец ја купи куќата на убиениот Оливер Ивановиќ во Митровица на Косово.
Куќата во Косовска Митровица во која беше сместена канцеларијата на убиениот претседател на Граѓанската иницијатива „Србија, демократија“, Оливер Ивановиќ, Косовската кредитна агенција ја продаде, од 1 јуни ќе биде ставена со катанец, а во просториите од 200 метри квадратни ќе се всели Албанец од јужниот дел на Косовска Митровица, пренесе „Политика“. Не е позната сумата за која е продадена куќата.
Потпретседателката на партијата ГИ СДП, Ксенија Божовиќ изјави дека по 26 години од партиските простории останале само голи ѕидови, а од 1 јуни практично исчезнува сето она што го направил Ивановиќ.
Таа додава дека не верувала дека куќата ќе биде продадена, со оглед на тоа што, како што рече, Ивановиќ поминал скоро третина од животот во таа куќа, пред неа е убиен, а пред влезот има мермерна плоча со слика на Ивановиќ, датумот кога е убиен и на која пишува „Никогаш нема да го напуштам Косово и Метохија“.
Ивановиќ е убиен на 16 јануари 2018 година, рочиштата за неговото убиство се одржуваат во Приштина од декември 2019 година, а според Ксенија Божовиќ, следното судење е закажано за јуни, затоа што претходно било одложено.
Тој бил голем хуманитарец, човек кој постојано повикувал на мир и разум, а бил и велемајстор во карате.
