Од 1. јануари нова цена на струјата
Цената на струјата останува иста за најголем дел од домаќинствата. Регулаторна Комисија објави дека од 1 јануари цената во првиот блок се намалува за 5,16%, за втор блок и евтината тарифа останува иста, а благо покачување има во третиот и четвртиот блок од 2,88%, односно 1,86%.
Овие цени се збир од цената на електричната енергија плус мрежарината.
Новиот надоместок за пренос и дистрибуција ќе чини 200 денари. Првиот регулатор, Бислимовски појаснува дека оваа ставка ќе важи за сите и ќе ја плаќаат и оние кои имаат празни станови, куќи и викендици. Овој нов додаток се воведува за да има фер распределба на трошокот на мрежа меѓу редовните кроисници и оние кои повремено ги користат објектите.
-Со воведувањето на овој пристап кон мрежа овозможивме цената за мрежарина да се намали за речиси 23%, вели претседателот на РКЕ, Марко Бислимовски.
Ова според министерот за економија во пракса би требало да ги намали сметките.
-На сметка на 2.000 денари, ако тарифата за дистрибутивна мрежа моментално е двојно од тоа што се плаќа за електрична енергија, таму има намалување од 27‘%. На 1.000 денари намалување од 27% е 270 денари, и ако плаќаш надоместок од 200 денари, имаш намалување од 70 денари. Да не зборуваме за сметки што се повеќе од 1.000 денари, вели министерот Бектеши.
Околу 80% од домаќинствата веќе ја користат дневната евтина тарифа, а очекувањата на надлежните се дека до крајот на годината сите ќе имаат евтина тарифа во периодот од 13 до 15 часот.
80% од домаќинствата се во првиот и во вториот блок на потрошувачи, но во зимскиот период тие што се греат на струја влегуваат и во третиот поскап блок. Според податоците од ЕВН, 10.000 домаќинства во ноември од првиот и вториот влегле во повисоките блокови.
Сител
