Обвинителството бара повисока, одбраната поблага казна за Јованов кој ја прегази Фросина Кулакова: „Голема грижа на совест имам за тоа што се случи“
Пред Апелациониот суд во Скопје денеска се одржа јавна седница по жалбите на пресудата на Основниот кривичен суд Скопје од 13 мај годинава, со која Васил Јованов беше осуден на 12 години затвор за тешки дела против безбедноста на луѓето и имотот во сообраќајот, по признание на вина за сообраќајната несреќа во која загина Фросина Кулакова во јануари на булеварот „Партизански одреди“.
Обвинителството побара преиначување на пресудата и изрекување на построга казна, додека одбраната инсистираше на нејзино намалување.
На седницата беше присутен и обвинетиот Јованов, спроведен од Затвор Скопје, кој уште еднаш изрази каење за стореното дело.
„Уште еднаш сакам да изразам најдлабоко каење и искрено сочувство на семејството на загинатата. Голема грижа на совест имам за тоа што се случи и болката што ја предизвикав“, изјави Јованов пред судот.
Судијката известител Александра Ристовска информираше дека по предметот има жалби и од Обвинителството и од одбраната – првите бараат повисока, а вторите поблага казна или враќање на предметот на повторно постапување.
Јавната обвинителка Фатиме Фетаи побара жалбата на Јованов да биде одбиена, а онаа на Обвинителството уважена, со образложение дека висината на казната не одговара на тежината на делото.
„Обвинетиот свесно управувал без возачка дозвола, под дејство на алкохол и поминал на црвено светло, со што предизвикал смрт на пешак. Со вакво однесување, без почитување на ниту едно сообраќајно правило, никој не може да се чувствува безбедно во сообраќајот“, рече Фетаи.
Таа додаде дека со оглед на зачестеноста и тежината на ваквите дела, потребно е доследно корегирање на казнената политика, а во конкретниот случај казната треба да се движи кон горната граница.
Одбраната, предводена од адвокатот Сашко Дуковски, побара намалување на казната или повторување на постапката, посочувајќи дека признанието на вина и искреното каење треба да се ценат како олеснителни околности.
„Признанието се дава со цел да се избегнат долги постапки и да се покаже дека сторителот се кае. Во моментот на донесување на пресудата, Јованов беше неосудувано лице, што Судот мораше да го има предвид“, истакна Дуковски.
Адвокатот посочи и на други случаи, како примерот со Ангелчо Николов од Велес, чиишто казни за слични дела биле пониски, нагласувајќи дека не треба да се создава нова судска пракса токму од овој предмет.
Основниот кривичен суд Скопје претходно му изрече 12 години затвор на Јованов, петгодишна забрана за управување возило и парична казна. Како олеснителни околности беа земени признанието, каењето, возраста и дотогашниот живот на обвинетиот, а како отежнителни – управувањето без возачка дозвола, под дејство на алкохол, преминувањето на црвено светло и фактот дека бил веќе осудуван за друго кривично дело.
Фросина Кулакова од Неготино загина на 29 јануари годинава кога, додека поминувала пешачки премин кај Универзална сала во Скопје, била прегазена од возилото со кое управувал Васил Јованов. Обвинителството утврди дека возачот бил под дејство на алкохол, без возачка дозвола и дека го минал крстосницата на црвено светло.
