Обложувалниците ќе бараат од Министерството за финансии да им ги врати парите за уплатените лиценци
Горан Стоименов од Асоцијацијата на приредувачи на игри на среќа – АПИС.во денешниот разговор со Аон рече дека приредувачите на игри на среќа ќе бараат од Министерството за финансии да им ги врати парите од високите суми по разни основи уплатени за лиценците за работа.
Пред два дена Собранието ги изгласа измените на Законот за игри на среќа со кои обложувалниците и казината ќе треба да се дистанцираат на најмалку 500-тини метри оддалеченост од училиштата и тоа да го направат во рок од една година.
Приредувачите на игри на среќа, според претставникот на АПИС, ќе бараат отштета од државата, бидејќи министерството за финансии минатата година даваше лиценци на приредувачите на игри на среќа, а сега со дистанцата од 500 метри, ќе има затворање на голем број од објектите.
„Освен што ќе оспоруваме пред Уставниот суд, ќе бараме огромна штета да ни се исплати од страна на Министерството за финансии како давател на овие лиценци, затоа што бизнис проекциите за добивање на една лиценца, за оформување на еден објект за игри на среќа не се задоволуваат во период од шест години, тоа се долгорочни планови, така да со вештачења и проценки ќе бараме штета, која ќе падне на грбот на граѓанинот. Проблемот во Македонија е што немаме свест за одговорност. Никој нема да понесе одговорност за ова што се презема и што се уништи една комплетно законска индустрија и да ги понесе сите побарувања на штети кои ќе паднат на товар на граѓаните како тужби за надоместа на штета и да каже ние сме одговрни, ние ќе ги надоместиме“, посочи Стоименов во интервјуто на А1он.
Според него, се остава простор игрите на среќа да се одвиваат нелегално и целиот приход да отиде во нечии џебови, а државата да нема никаков приход од тоа. Со овој закон, над 90 отсто од актуелните објекти ќе мора да се затворат поради дистанцата која е донесена со предлог-измените.
