Новите измени на КЗ предизвикуваат револт: Државните службеници и министри може да избегнат одговорност за несовесно работење!?

Новите измени на Кривичниот законик, поднесени од девет пратеници на ВМРО-ДПМНЕ, предизвикаа загриженост кај стручната јавност. Иако се предвидува заострување на казните за „Злоупотреба на службената положба и овластување“, највисоката казна сега е 10 години, наместо 20 како досега.

Експертите реагираат дека со измените се иззема одговорноста на службениците во државната управа, вклучувајќи ги и министерствата, за несовесно работење. Ставот 5 од членот 353в, кој предвидуваше казна затвор од шест месеци до три години за такви случаи, е избришан.

Исто така, новиот член 353 став 5 за злоупотреби при јавни набавки предвидува затвор од една до осум години, или четири до десет години во случаи на голема штета или корист. Експертите предупредуваат дека во пракса малку веројатно е да произлезат обвиненија, бидејќи реалните злоупотреби се прават во друга насока.

Измените се поднесени од група пратеници, а не од Министерството за правда, кое го подготвува новиот Кривичен законик. Од Владата велат дека нацрт-верзијата е во завршна фаза и ќе биде усогласена со три нови ЕУ директиви, по што ќе влезе во собраниска процедура.