Новинарката Катерина Цаневска – носител на советничката листа на СДСМ за Град Скопје
Долгогодишната новинарка и професионалец за односи со јавност, Катерина Цаневска, е изборот на СДСМ за носител на советничката листа за Град Скопје на претстојните локални избори, откри лидерот на партијата Венко Филипче во интервју за „Слободен печат“.
Според Филипче, СДСМ составил „навистина добра листа“ со докажани професионалци од клучни области за функционирањето на градот, како урбанизам, архитектура и образование.
„За носител на градската листа ја планираме госпоѓата Катерина Цаневска, којашто е искусен човек, новинар со долгогодишно искуство во скопската хроника, искусна во соработката со локалната власт и мислам дека е човек кој што има кредибилитет да излезе пред граѓаните со програмата“, изјави Филипче во интервјуто што интегрално ќе биде објавено утре.
Тој додаде дека се надева оти граѓаните ќе ѝ ја дадат довербата на Цаневска да го предводи тимот кој ќе ја исполни партиската програма, „за Скопје конечно, после 4 години со ВМРО-ДПМНЕ, да заличи на град“.
Катерина Цаневска е добро позната на јавноста како долгогодишна новинарка, најпрво во МРТВ, а потоа и во А1 телевизија. По новинарската кариера, таа работеше во секторот за односи со јавност, најпрво во Општина Центар во времето на градоначалникот Андреј Жерновски, а потоа и во кабинетот на претседателот Стево Пендаровски.
