Нови кадри во Мала Речица: Генералниот совет на ДУИ ги избира новите претседатели на ограноците

Во седиштето на ДУИ во Мала Речица попладнево започна првата седница на новиот Генерален совет на партијата по одржувањето на неодамнешниот Конгрес.

Според информациите од терен, состанокот започнал околу 17:00 часот, а на него учествуваат 30 членови, што претставува значително проширување во споредба со досегашните 10 членови на ова тело. Оваа кадровска промена е директен резултат на одлуките донесени на последниот партиски Конгрес.

Иако од партијата официјално не го соопштија дневниот ред, неофицијални извори брифираат дека фокусот на вечерната средба е целосното екипирање на партиската структура.

Оваа седница доаѓа по конгресните промени со кои беа заменети значајни кадри. Партијата претходно соопшти дека е променето дури 80% од партиското раководство, со исклучок на лидерот Али Ахмети, кој го доби својот петти мандат на чело на ДУИ.

Повеќе детали за конечните одлуки и новите кадровски решенија се очекуваат по завршување на состанокот, кога партијата треба да излезе со официјално соопштение.